KIAT HARAT  HARAT MANJINAK AKAN SUAL UN TAHUN 2016

(CARA JITU MENJINAKKAN SOAL UN TAHUN 2016)

 

Kada lawas lagi Ujian Nasional (UN) tahun 2016 dilaksana akan, ujar pang habar ada 3 sip palaksanaan UN di tahun ini. Sip pamulaan tu bulan pabuari atawa bulan dua hagan UN parbaikan yaitu hagan bubuhan kakanak sakulah yang sudah maumpati UN di tahun tadi hagan mambaiki nilai jua hagan maulang bagi nang kada lulus UN nya nentu, imbah tu sip Kadua bulan April atawa bulan ka ampat nentu UN sabanarnya di tahun 2016 ngini, wan sip pawakasan UN nya tu mulai bulan Juni lacit Saptimbir hagan bubuhan pasarta UN yang kada lulus. Wa bil khusus UN parbaikan ujar dilaksanakan sacara unlin mamakai sistem Ujian Nasional Berbasis Kumpitir (UNBK). Nah ! Siap siap lah bubuhannya mun mahadapi UN di tahun ini.

Lawan  cara nang kaya itu Pamarintah sudah bausaha manyamani  pacang warganya hagan maumpati UN tinggal bubuhan kita haja lagi manapaat akan kasampatan baik ini bujur bujur tarutama bubuhan kakanak sakulahnya bajalar bubujur, wan jua urang tuhanya manilik mahaga e kanakanknya supaya hakun balajar walaw dalam kaadaan yang saadanya haja sasuai kundisi rumahnya masing masing

UN di tahun 2016 ini wartanya masih pina simpang siur pang, kada mangaruan, ada nang handak pakai unlin, ada nang handak manual cara bahari. Mudahan dalam palaksanaannya kada takandala tiknis kaya tahun sabalumnya.

UN tahun ini ada sadikit babida, pasal nya :

Pasal 1 :

UN masih kada lapas antara  soal jua materi nang dilajar akan, tahun ini babida dalam hal paulahan sual wan matiri. Sebab tahun ini dikahandaki adanya gabungan matiri kurikulim 2006 (K-2006) jua Kurikulum 2013 (K-13) yang basa lautnya “matiri irisan K-2005 wan K-13” nang maksutnya bila matiri itu ada di K-2006 wan di K-13 maka matiri nintu kawa di ulah akan sual  hagan UN nya, wan bila ada matiri nang tacantum di K-2006 tapi kadada di K-13 atawa  sabaliknya maka matiri nentu kada di ulah akan sual hagan UN tahun ini.

Pasal 2 :

Paulahan sual UN lawan matiri irisan nang sudah disasuai akan dilihat sakilas masih talalu umum . babida lawan UN di tahun sabalumnya dimana matiri wan kuntik SKL indikatur nang bakal di jadi akan sual sudah jalas, dimana sual Un tahun ini ma acu lawan bantuk sual bataksonomi nang labih tinggi dimulai matan C₃ lacit C₆ ditambahi lawan sual sual panas (HOTS) nang parbandingannya 40%  sual batingkatan nyaman , 40% sual batingkatan sadang wan 20% sual batingkatan ngalih (Sual sual HOTS).  HOTS ini adalah sual bapikir tingkat tinggi (HOTS = Higher Order Thinking), sual bataraf intarnasiunal.

TIPS manunduk akan sual sual HOTS

Sabanarnya sual HOTS ini adalah sual dalam ujut kasaharian dalam kahidupan kita. Pasalnya kanapa jadi dilihat pina ngalih banar kita manjawabnya karana kita jua nang kurang mambiasa akan diri mambahas ma analisa wan kurang kariatip dalam kahidupan balalu asa kaku kita manjawab kaitu jua mun malaku akannya dalam kahidupan nyata, dimana kabiasaan kita itu banyak manguk tiuri daripada maamal akan tiuri nentu manjadi katarampilan kahidupan.

Pawakasannya :

Gasan mahadapi wan manjinak akan sual sual UN tahun 2016 ini mudalnya :

1.       Badua kalawan Tuhan supaya babarkah manjawapi sual lulus lawan nilai nang baik bagus

2.       Minta maap ampun wan rastu tarutama wan kuitan wan guru kalu ada tasalah wan silapnya supaya kada jadi panghalang kita hagan lulus UN

3.       Balajar bubujur tarutama mampalajari ulang matiri nang bakal di uji akan, kakanak sakulah kawa maitihi nya di laman BNSP tantang kisi kisi UN 2016 (baca jua : Cara Belajar IPA yang Mudah dan Menyenangkan di laman blog Sindang Langit Banua edisi tadahulu)

4.       Kada usah gugup bahadapan wan sual, tuh inya kada maigut jua, nang mau mamakan urang nang manjawap sualnya. Intinya kada usah ba satris satris diri bahujung bagaringan kaina. Siap akan pisik wan mintal astilahnya  jer urang tu

5.       Walaupun  Nilai UN ini kada manantuakan kalulusan sakulah ada baiknya kakanak manjawap sualnya bubujur supaya nilainya baik, sabab nilai UN ini dipakai gasan prasarat dasar manyambung ka sakulah  nang labih tinggi, salain itu jua manunjuk akan prestasi.

6. Salamat batampuh di UJIAN NASIONAL di tahun ini , Salam Sukses !

 Oleh oleh   Bimtek Pendalaman Materi  Mata Pelajaran yang di UN kan (Region Kalimantan) di Hotel Nasa Jl. Djok Mentaya No.8 Kota Banjarmasin Kalimantan Selatan  21/10/2015